Прослава на историската победа на фудбалската репрезентација на Македонија над Италија ќе се организира вечерва на главниот скопски плоштад „Македонија“.
Фудбалската федерација на Македонија денеска ги повика сите граѓани кои сакаат да им се заблагодарат на нашите момци кои синоќа го победија европскиот прват Италија, вечерва во 18 часот и 30 минути да бидат на плоштадот Македонија.
Пристигнувањето на фудбалската експедиција на скопскиот аеродром со чартер-лет од Палермо е најавено за 17:30 часот.
Синоќа, илјадници македонски навивачи спонтано ја славеа големата победа низ скопските улици, по што масовно се собраа на плоштадот „Македонија“, а триумфот се славеше и низ други градови во државата.
