Во седиштето на владејачката СДСМ во тек е средба со коалициските партнери на која се разговара за евентуално проширување на владината коалиција. во контекст на постигнување парламентарно мнозинство за уставни измени.
Разговорите ги води генералниот секретар на СДСМ Миле Зечивеќ, а меѓу присутните се и лидерите на НСДП, ДОМ и на Демократски сојуз, Горан Мисовски, Маја Морачанин и Павле Трајанов.
На средбата не присуствува премиерот Димитар Ковачевски, кој беше на седница на Советот за безбедност во Кабинетот на претседателот Стево Пендсаровски.
Пред состанокот претседателката на ДОМ Маја Морачаин изјави дека досега немале никаков разговор, ниту некои конкретни информации, освен ова што беше споделувано во медиумите.
-Сакам прво да ги слушнам информациите, што се планира, која е целта на евентуално зголемување на мнозинството, што тоа ќе значи и во однос на програмата и во однос на кадровските решенија, и се разбира она што е важно за ДОМ, ние сакаме да ги наметнеме прашањата и темите коишто се важни за нас да бидат реализирани, изјави Морачанин.
Лидерот на ДС, Павле Трајанов рече дека Влада, реконструкција на Влада ќе поддржат доколку се почитува амандман 6 од Уставот
– Ставот на ДС, и мојот став како претседател на партија е јасен. Влада, реконструкција на Влада ќе поддржиме доколку се почитува амандман 6 од Уставот. Тоа е соодветна и правична застапеност на сите етнички заедници во власта и во другите институции. Доколку се отстапува тоа начело, тогаш нема да поддржиме реконструкција на Владата, изјави Трајанов.
Претходно денеска дел од коалициските партии од власта за МИА потврдија дека премиерот и лидер на СДСМ, Димитар Ковачевски вечерва во 20 часот во Клубот на пратеници ќе одржи средба со лидерите на коалициските партнери на СДСМ.
Ковачевски денеска порано во изјава за новинарите рече дека разговарал и оти и денеска ќе разговара со добар дел од коалициските партнери во однос на, како што вели, темите што се значајни за работењето на Владата, а се од интерес за граѓаните, како што е продолжувањето на европскиот пат на земјата.
