15 годишник од Скопје е обвинет за „тероризам“. Тој од својот мобилен телефон испраќал пораки со заканувачка содржина во повеќе училишта, соопштуваат од МВР.
Денеска (22.03.2023) Секторот за борба против тероризам, насилен екстремизам и радикализам при Одделот за сузбивање на организиран и сериозен криминал до Основно јавно обвинителство за гонење на организиран криминал и корупција поднесе кривична пријава против 15-годишник од Скопје, за сторено кривично дело „тероризам”. Пријавениот малолетник на 24.02.2023, користејќи го својот мобилен телефон креирал електронска адреса и истиот ден, користејќи го својот лап-топ компјутер од својот дом испратил порака со заканувачка содржина на службената електронска адреса на едно средно училиште во Скопје, за која по извршени проверки било утврдено дека е лажна. Притоа, со цел да ги прикрие своите активности при испраќање на поракaта малолетникот користел VPN апликација.
По преземени мерки и активности од страна на Секторот за компјутерски криминал и дигитална форензика утврдена е користената ИП адреса, чиј сопственик е таткото на малолетникот, а врз основа издадена Наредба за претрес на дом од Основен кривичен суд Скопје, извршен е претрес во домот на родителот на малолетникот, од каде привремено се одземени мобилен телефон, сим картичка и лаптоп компјутер кои ги користело малолетното лице.
Од извршеното вештачење е утврдено дека истата електронска адреса е користена за да се испраќаат пораки со заканувачка содржина до неколку училишта на територијата на град Скопје од мобилен телефон и од лаптоп компјутер, во повеќе наврати, се вели во соопштението.
Со малолетникот во присуство на негов родител, инспектор за малолетници и семејно насилство од СВР Скопје и адвокат, во полициска станица е извршен службен разговор, во текот на кој тој го појаснил начинот на извршување на кривичното дело.
