Провокативен чин викендов стори група на албански планинари откако од планинскиот врв Голем Кораб со симнаа македонското државно знаме и го закачија албанското. Зад овој дрзок чин стои албанскиот планинар од Пешкопеј Изет Шулку со неговото друштво, а кој сето ова го објави и на социјалната мрежа Фејсбук.

-Кораб е на Албанија и таму нема место за македонското знаме, напиша Шулку на својот фејсбук-профил и го објави видеото.

Во објавата се гледа Шулку, кој се претставува како албански државјанин, како е искачен на постаментот и како го симнува македонскиот државен симбол, а го закачува албанскиот двоглав орел.

На врвот Голем Кораб кој припаѓа на Националниот парк Маврово стои информативна табла со налепница испишана на македонски јазик со надморската височина на врвот – 2.764 метри и дека корабскиот планински масив е во две земји Македонија и Албанија, но Шулку исто така ја искина и фрли.

Засега нема реакции од македонските власти за оваа дрска провокација на групата албански планинари кон македонскиот државен симбол. На Фејсбук видеото наиде на симпатии кај албанската публика.