Овој петок со почеток во 20 часот во галеријата во Младинскиот културен центар во Скопје, ќе се отвори архитектонската изложба со наслов „Скопје: нови индустрии на стари локации“. Оваа изложба е резултат на едногодишен научноистражувачки проект насочен кон мапирање, проучување, вреднување и промоција на напуштениот индустриски простор како можност за иден економски, просторен и програмски развој на градот Скопје.
Проектот го истражува и претставува процесот на реиндустријализација во градот Скопје, кој иако има позитивна улога во регенерацијата и рационалното искористување на урбаниот простор, се случува во сенка на процесите на деиндустријализација и пренамена на индустриските локации за други неиндустриски намени, кои имаат многу повидливо влијание на просторот.
Целта на проектот е да го афирмира пристапот на обнова и повторно користење на овие локации за нови производни незагадувачки индустрии во прилог на јавното добро и во корист на жителите на градот Скопје.
Учесници во научноистражувачкиот проект се: Горан Мицковски – раководител на проектот, Ана Ивановска-Дескова, Јован Ивановски, Димитар Крстески, Теа Дамјановска, Mихајло Стојановски и Мила Гавриловска. Научноистражувачкиот проект е финансиран од Универзитетот „Св. Кирил и Методиј“ во Скопје, во реализација на Архитектонскиот факултет.
Изложбата ќе трае до 30 март 2023 година.
