Арсенал ја доби лондонската пресметка против Челзи на „Емирати“ со 2-1 и направи важен чекор во трката за шампионската титула. Тимот предводен од Микел Артета повторно има пет бода предност пред Манчестер Сити, но со одигран натпревар повеќе.
Домашните поведоа во 21. минута кога Вилијам Салиба беше највисок по изведен корнер и ја затресе мрежата на Челзи. Гостите сепак успеаја да израмнат во судиското продолжение од првото полувреме, откако топката заврши во мрежата по автогол на Хинкапи.
Во вториот дел Арсенал повторно беше поопасен, а нов корнер донесе и нов погодок – Тимбер во 66. минута ја врати предноста на „топчиите“. Само четири минути подоцна Челзи остана со играч помалку по исклучувањето на Педро Нето, што значително им ја олесни задачата на домаќините да го сочуваат водството до крајот.
Со оваа победа Арсенал останува во одлична позиција во битката за титулата, додека Челзи продолжува со променливи резултати во лондонските дерби натпревари.
