Градоначалничката на Скопје Данела Арсовска синоќа организираше состанок на кризниот штаб и го обвини претседателот на ВМРО-ДПМНЕ дека стои зад протестите во „Комунална хигиена“ и ги политизира.
-Вечерва стана јасно кој ги организира и кој стои во блокадата за нерасчистувањето во Скопје. Тоа го прави лично Мицкоски со неговите градоначалници. Сакам да му порачам на Христијан Мицкоски дека е разобличен вечерва зашто за ефтини поени сака да креира проблеми кај граѓаните, а потоа да се претставува дека ги решава тие проблеми. Таквите политичари се најголемото ѓубре кое го видело овој град и ние вечерва ќе почнеме, со чистењето на ѓубрето, да ги чистиме и нив, со навредлив тон се обрати Арсовска кон поранешниот политички партнер од локалните избори.
Арсовска пред новинарите покажа и список на кој според неа се гледа дека дури 40 лица од едно исто семејство биле вработени во ЈП Комунална Хигиена и земале со години плата од претпријатието. Таа на новинарите им покажа документ на кој стоеше презимето Дардишта, како и повеќе имиња. Во делот на функции, стоеја: метач, советник на директор, работник за собирање смет, хигиеничар.
-Од документот можете да видите дека едно презиме, односно една фамилија, во јавното претпријатие „Комунална хигиена“ има вработено се што му е род до шесто колено, рече таа.
