Барања на здруженија на пациенти: Да се прошири позитивната листа на лекови, не е сменета 15 години

За да не се случува недостиг на лекови за посебни и ретки болести потребно е да се ревидира и прошири позитивна листа на лековите која не е сменета веќе деценија ипол, побараа денеска повеќе здруженија на пациенти.

-Потребно е и да се подготви законска рамка за договори за влез на лекови, директни договори со производителите поради олеснет пристап до нови и скапи терапии, соопшти на денешната прес-конференција Андреј Сених од Здружението за поддршка на луѓето што живеат со ХИВ – „Заедно посилни“ – Скопје.

Весна Алексовска од Здружението за ретки болести „Живот со предизвици“ се осврна на тендерските постапки преку кои се набавуваат лековите за ретки болести.

-Нема на позитивната листа никакви промени повеќе од 15 години и поради тоа единствениот начин да влезе некој нов лек во нашата држава се програмите на Министерството за здравство, кои претходно служеа само за превентива, а сега служат за набавка на лекови и дополнително преку буџетите на клиниките и болниците кои добиваат условни буџети од Фондот за здравствено осигурување, рече Алексовска.

Таа посочи дека секогаш доцнат тендерите и додаде дека Програмата за ретки болести е само еден пример. Секоја година, како што рече, доцнат лекови за пациентите, од еден до шест месеци, а понекогаш се случува и никој да не се јави на тендерската постапка за одреден лек. Поради ова пациентите се ставаат во животозагрозувачка состојба.

-Ако лековите се на позитивната листа, пациентите можат да ги купат лековите од странство и да ги рефундираат преку Фондот за здравствено осигурување. Но, поради тоа што не се на позитивната листа тие не можат никако да рефундираат, значи ако купат лекови ги купуваат на свој трошок, рече Алексовска додавајќи дека лековите се скапи и претставуваат товар за буџетот на едно семејство.

Претходна вестАрсовска назначи нови директори: Саид Саид во „Улици и Патишта“, Крсте Петрески на чело на „Градски паркинг“…
Следна вестСо украден „форд фокус“ удрил во службени возила, се повредил себе си, двајца полицајци, и осум мигранти