Средношколци со попреченост и оние од приватните училишта да можат да го користат бесплатниот јавен превоз, побара денеска Сојузот на средношколци на Македонија. Оваа организација денеска во Собранието ќе поднесе Предлог за измени и дополнување на Законот за средно образование, во членот што се однесува на правото на превоз на учениците.
– Се работи за околу две илјади од вкупно 71 илјада средношколци во државава. Предлогот за измени на Законот ќе го доставиме до сите пратенички групи и очекуваме пратениците да го поддржат. Тој не се однесува само на приватните училишта, туку со него се бара бесплатниот превоз да важи и за средношколците со посебни образовни потреби сместени во државните домови, како за учениците што живеат на помалку од два и пол километри од училиштето, информира Лука Павиќевиќ, претседател.
Тој додаде дека се бара јавниот превоз да биде бесплатен и налето зашто учениците од државните стручни училишта имаат феријална пракса за време на летниот и на зимскиот распуст.
– Според сегашниот закон, иако одат на пракса да работат како дел од дуалното образование, тие својот превоз го плаќаат, рече Павиќевиќ.
Панде Ефтимов, претставник на Младинскиот образовен форум (МОФ) и активист за правата на учениците со попреченост од средните училишта рече дека со сегашното законско решение тие се дискриминирани и во јавниот транспорт и дека имаат право да бидат рамноправни со нивните врсници.
-На учениците со оштетен вид и слух веќе им е доволно тешко во секојдневното живеење и овој закон многу ќе им ја олесни пристапноста кон образованието, рече тој.
Ако предлог-законот не биде усвоен во Парламентот за најмногу два месеца, Сојузот на средношколци ќе поднесе иницијатива до Уставниот суд за тој да ја оцени уставноста на сегашните одредби.