Скопје синоќа имаше можност да види прекрасен музички проект. Македонскиот пијанист со светско реноме Симон Трпчески пред многубројна публика го промовираа проектот „Македонисимо“. Големото плато пред „Опера и балет“, беше преполно, немаше место каде да се застане за да се слушаат изворните македонски: „Не си го продавај Кољо чифликот“, „Поступано оро“, „Невестинско оро“… преплетени со разни џез и класични музички влијанија.
-Браво маестро, често подвикнуваше публиката на која не и беше тешко да стои скоро два часа, напротив дури и играше на познатите македонски ритми.
Концертот беше бесплатен и како што рече Трпчевски тоа е подарок за народот на Македонија. За потсетување: Музичкиот проект „Македонисимо“ на Трпчески и пријателите, имаше светска премиера во Германија.
Песните и ората кои тој ги отсвири со Александар Краповски на виолина, Александар Сомов на виолончело, Хидан Мамудов на кларинет и саксофон и Влатко Нушев на удиралки, Трпчески ги создаде во соработка со познатиот композитор Панде Шахов. Сите на крајот од концертот добија овации.
Трпчевски со многу радост го водеше целиот концерт, говореше и објаснуваше навистина говорнички – спонтано, свиреше виртуозно на клавир и хармоника, пееше одлично…
-Горд сум што ќе имаме можност да го претставиме овој проект на македонската публика, на народот на којшто овој проект е посветен. Проектот зачна одамна во мојата глава и можам слободно да кажам и во моето срце, бидејќи јас сум задоен, па пораснат со народната музика. Таа секогаш била вткаена дури и во целосното мое образование како музичка личност, коешто јас го стекнав во Македонија и отсекогаш верував во потенцијалот што нашата народна музика го има доколку се преточи и во еден поинаков музички јазик, изјави меѓу другото Трпчески на вчерашната прес-конференција.