Многу приговори пристигнаа во ДИК. Дел од партиите се незадоволни од изборниот процес. Имено, до Државната изборна комисија синоќа до истекување на рокот биле поднесени 2.141 приговори за сумирањето и утврдувањето на резултатите од гласањето на изборите.
Пред ДИК е сериозна работа, бидејќи треба да се произнесе за сите приговори во рок од 72 часа. Се очекува највисокото изборно тело да закаже седница денеска, а најдоцна во понеделеник на која јавно ќе ги разгледа и ќе одлучува, по приговорите.
Најмногу приговори 1.982 поднеле од Левица, а Алијансата за Албанците која на изборите настапува во коалиција со Алтернатива вчера и завчера поднесе вкупно 151 приговори. Од приговорите два има и од ВМРО-ДПМНЕ кои се однесуваат на сумирањето на резултатите од гласањето. СДСМ, нема приговори. Поднесено е и едно барање за увид во неважечките ливчиња од гласањето.
Инаку, во меѓувреме, Државната изборна комисија вчера објави соопштение со кое ги корегираше резултатите од изборите одржани на 15 јули, а објавени на 16 јули. Како што се наведува во објавениот Заклучок за исправка на технички грешки, вкупниот број на избирачи кои гласале изнесува 943.750, што е за 1.416 повеќе од првично објавената бројка, а вкупниот број неважечки гласачки ливчиња изнесува 31.564 или за 98 повеќе.