Српскиот тениски ас Новак Ѓоковиќ на 38 години ја освои титулата на АТП турнирот во Атина, победувајќи го Лоренцо Мусети во спектакуларно финале со 4-6, 6-3, 7-5, по речиси три часа борба.
Ова е втора титула за Ѓоковиќ оваа сезона и вкупно 101-ва во неговата кариера, приближувајќи се до рекордите на Роџер Федерер (103) и Џими Конорс (109). Дополнително, Новак стана најстариот АТП шампион од 1990 година, надминувајќи го Гаел Монфис, кој освои титула во Окленд на 38 години и четири месеци.
Финалето го започна Мусети со ранен брејк и водство од 1-0 во сетови. Но, Ѓоковиќ одговори со препознатливата точност и ментална сила, израмнувајќи во вториот сет со важен брејк.
Третиот сет беше вистински трилер. Новак поведе со 3-1, Мусети возврати со брејк во шесттиот гем, но српскиот шампион повторно направи брејк за 5-4. Иако пропушти неколку шанси да го заврши мечот, во клучниот момент покажа за што е способен и на 6-5 ја потврди победата пред бурните аплаузи на атинската публика.
Ова е деветта победа на Ѓоковиќ во десет дуели против Мусети, но едно од најтешките финалиња во неговата кариера. Сè уште не е потврдено дали ќе настапи на АТП финалето во Торино, иако шефот на Италијанската тениска федерација тврдеше дека Новак е пријавен.
„Не знам од каде ја имаат таа информација,“ изјави Новак пред медиумите. „Ќе одлучам по завршувањето на овој турнир.“
Дури и на 38 години, Новак Ѓоковиќ продолжува да гради своја легенда и да ја пишува историјата на тенисот.
МОЖЕБИ ЌЕ ВЕ ИНТЕРЕСИРА:
