Еурофарм Пелистер одигра 28:28 на гостувањето кај ГОГ Гудме во 12. коло од ракометната Лига на шампиони. Македонскиот првак долго време беше во подредена позиција, но во клучните минути успеа да направи пресврт и да стигне до бод.
Голманот Никола Митревски со 13 одбрани беше клучен за Пелистер, кој со овој бод стигна до пет и останува на седмото место на табелата, додека ГОГ Гудме е на шестото место со девет бодови.
Мечот започна лошо за битолчани – домаќините поведоа со 4:1, а кон средината на првото полувреме имаа и 8:4. Во еден момент ГОГ водеше со пет гола предност (13:8), за на полувреме да замине со 15:11.
На стартот на второто полувреме, Пелистер повторно за момент водеше со пет гола разлика (16:11), но домаќините не се предаваа и продолжија да држат предност. Со резултат 23:19, следеше пресвртот за македонскиот првак. Со одлична серија од 6:1, Пелистер за првпат на мечот стигна до водство (25:24), а потоа следеше неизвесен финиш со игра гол за гол.
Во последната минута, ГОГ водеше 28:27 откако беше исклучен Граховац кај Пелистер. Но, со играч помалку, Видомски израмни на 28:28 само седум секунди пред крајот. Последниот напад на ГОГ не резултираше со гол благодарение на добрата одбрана на битолчани.
