Град Скопје со кривични пријави против четири лица, одобриле исплата на 75.000 евра за портал кој не профункционирал

Злоупотреба на службената положба и овластување и несовесно работење е основ за кривичната прија која Град Скопје ја поднесе до Основното јавно обвинителство  против четири лица. Пријавата е поднесена против поранешниот генерален секретар на Град Скопје Викторија Аврамовска Мадиќ, поранешниот помошник раководител на сектор за поддршка на градоначалник Ваљон Салиху, раководителот на одделението за ИКТ инфраструктура Никола Трајковски, како и вишиот соработник во одделение за координација на активности на градоначалник Влатко Васиљ.

Според Данијел Апостолоски, советник за односи со јавност на Град Скопје претходното раководство на Градот платило над 75.000 евра за изработка на официјален веб портал на Град Скопје кој никогаш не профункционирал во целост, односно била платена поголема сума од реалната за ваков тип на услуга која не била реализирана како што било предвидено.

-Викторија Аврамовска Мадиќ од Скопје во својство на Секретар на Град Скопје, искористувајќи ја својата службена положба и овластување во периодот од 2018 до 2020 година, потврдила дека во целост е реализиран договор за Изработка на Официјален портал на Град Скопје со миграција на постоечките податоци и Дигитална платформа за интерконекција и управување со веб содржини и постапувајќи несовесно во вршење на своите овластувања и должности, потврдила дека е извршено предавање на платформа и прилагодување на порталот кои активности се предмет на реализација на склучен договор иако знаела дека не е испорачано ИБМ ЕСБ, посочи Апостолски.

Според него, не била извршена целосна миграција на податоци од постојната веб страна и не бил предаден порталот, а останатите пријавени со свои потписи потврдиле дека се извршени и предадени поединечните фази од наведениот проект, иако знаеле дека дека договорот не е во целост реализиран.

-Пријавените Никола Трајковски, Ваљон Салиху и Викторија Аврамовска Мадиќ искористувајќи ја својата службена положба сепак потпишале и одобриле исплата на вкупната вредност на договорот во износ од енормни 4,717,640 денари или над 75.000 евра за услуга која не е целосно извршена и испорачана на Град Скопје согласно договорот, на кој начин пријавените прибавиле имотна корист за друг и нанеле штета на буџетот на Град Скопје, рече Апостолски.

Инаку, Викторија Аврамовска Мадиќ од денеска ја извршува функцијата заменик министер за правда откако беше избрана во Собранието на Македонија во рамките на реконструкцијата на Владата.

 

 

 

Претходна вестРеткост во спортот: Татко и син ќе играат во иста екипа
Следна вестИмигрант во Шведска избодел девојка