По два дена закани за поставени бомби во средните училишта во градот Скопје, кои ја вознемирија јавноста, и денеска информации за нови евакуации. МВР Скопје соопшти дека на мејл адреса на едно училиште е испратена закана за поставена експлозивна направа.
-Веднаш по добиената пријава, од страна на полициските службеници се преземаат мерки за безбедно евакуирање на училиштето и антитерористички проверки и се преземаат мерки за расчистување на случајот, се наведува во соопштението.
Според сознанијата се работи за средното училиште „Никола Карев“ од скопската општина Карпош.
Околу 15 часот и 15 минути и учениците од гимназијата „Раде Јовчевски – Корчагин“ добиле наредба да ја напуштат училишната зграда.
-Бевме на голем одмор по вториот чест. Кога сакавме пак да се вратиме во зградата еден од професорите ни рече да не влегуваме. Истовремено, од зградата почнаа да излегуваат и преостанатите ученици. Не ни кажаа дали е пак добиена пријава за бомба, ни рече еден ученик.
Дојави за бомби стасале и во МБУЦ „Илија Николовски – Луј“, Медицинското училиште „Панче Караѓозов“, како и гимназијата „Георги Димитров“ кои претходните 2 дена немаа дојави.
Фото: Архива