Ива Митева старо-нова претседателка на бугарското Собрание

Бугарскиот Парламент со 137 гласа „за“ за претседател ја избра адвокатката Ива Митева од партијата „Има таков народ“, која беше претседател и во претходниот состав на парламентот, јави дописникот на МИА од Софија.

Митева беше избрана и со гласовите на Движењето за права и слободи, додека ГЕРБ и БСП беа воздржани.

За кандидатот на БСП за претседател на Националното собрание, Кристијан Вигенин гласаа 35 пратеници, колку што е бројот на нивната пратеничка група.

Во својот прв говор новоизбраната претседателка на 46. Народно собрание му посака успех и среќа на новиот бугарски Парламент.

Лидерот на ГЕРБ и поранешен премиер, Бојко Борисов, вчера објави дека неговата партија нема да номинира кандидат за претседател на Националното собрание, туку само заменик претседателката Росица Кирова, која до пред неколку месеци беше активист на „Има таков народ“ од Видин, но беше исклучена од партијата заради средба со тогашниот бугарски премиер Борисов за време на неговата посета на регионот.

Шефот на парламентарната група на Има таков народ, рече дека очекува во наредните две недели партиите со кои тие ќе преговараат да формираат нова влада, која ќе го продолжи курсот на сегашната техничка влада. Тој притоа рече дека е тоа можно доколку се гледа интересот за прокмени во државата, а не борба за функции. Доколку тоа не се случи Тошко Јорданов рече дека „ќе има нови избори“.