Левица бара платено породилно отсуство и за жените кои што работат земјоделие

Пратениците да го изгласаат Предлог-законот на Левица за жените земјоделки да добијат платено породилно отсуство повика Весна Кираџиева, раководител на Антифашистичкиот фронт на жените (АФЖ) на оваа партија. Според нив земјоделките во Македонија се дискриминирани во однос на останатите работнички за правото на платено породилно отсуство.

– Оваа нееднаква социјална политика сериозно се одразува врз репродуктивното, психолошко и физичко здравје, а за жал и врз здравјето на новороденчињата и децата. Оваа нееднаквост кај земјоделките ги принудува да работат за гол опстанок и доведува до значителни здравствени ризици.

Правото на надоместок на плата за време породилно отсуство, по својот социјален карактер значи планирање на семејство и е обврска на државата и треба да е на товар на Републичкиот буџет.

Со предложеното законско решение кое го поднесоа пратениците на Левица, Димитар Апасиев и Борислав Крмов, ќе се заштити мајчинството како основно право на жените загарантирано со Уставот и со меѓународните акти. Жените-земјоделки ќе добиваат паричен надоместок за време на породилно отсуство кое не може да биде пониско од минималната плата. Очекуваме и ги повикуваме сите пратеници и пратенички во собранието да го изгласаат овој наш Предлог-закон во интерес на земјоделките, како една од најранливите категории.

И додека владејачката ДУИ со СДС купуваат гласови со привидни мерки и мизерни 9.000 денари месечно кои ги нудат за мајчинство на земјоделките, Левица нуди трајно законско решение со кое жените-земјоделки ќе имаат гарантирана финансиска сигурност за време на породилното отсуство, се вели во соопштението на оваа партија.

Од оваа партија велат дека ќе продолжат да ги бранат и застапуваат интересите на сите жени во Македонија.

Претходна вестНово пукање во САД, има жртви
Следна вест62-годишен маж ја нападнал вработената и ограбил обложувалница во Скопје