Мицкоски: Барам слобода за Ламбе, власта да ги увиди своите грешки

Ослободување на притворениот Ламбе Алабаковски побара денеска лидерот на ВМРО-ДПМНЕ Христијан Мицкоски. Според него, предизвикувањето на пожарот на бугарскиот културен центар од страната на Алабаковски е резултат или реакција на политиките на „оваа криминална и анационална влада“. Мицкоски рече дека тоа е реакција на сите погрешни политики на владата изминатите години, потенцирајќи дека ниту претходно кога се уништувал државен имот од страна на Шарената револуција, ниту пак сега не прифаќа насилство.

-Мојата порака е до оние кои што пред само неколку години како припадници на една револуција уништуваа државен имот, бојадисуваа државен имот, палеа канцеларија на претседател на држава, да ги ослободат судиите и обвинителите да донесат пресуда согласно правдата, да го ослободат Ламбе, да помине со укор. Морам да признам ниту тогаш ниту сега насилството не го прифаќам како начин на решавање на проблемите. Но, ова е реакција на сите овие погрешни политики изминатите години и затоа барам слобода за Ламбе, да го ослободат човекот и да се свртат сами кон себе, да ги видат своите грешки за ова да не стане масовна појава во Македонија, бидејќи народот е револтиран правдината да ја земе сам во свои раце, изјави Мицкоски.