Владата имаше време за точна стратегија за учење од 1ви, зошто ја нема?!

Дваесет дена пред почетокот на новата учебна година. Да се каже дека немало време за целосно истражување на терен за да се направи точна стратегија е навредливо за граѓаните и е невистина. Се разбира, тоа никој не го кажа буквално вака, но изјавата на – се уште министерот Арбр Адеми – дека не сака да прејудицира за точниот начин на стартот на наставата на 1-ви септември, е ништо друго освен немање никаков план. А уште помалку стратегија.

Па така, на само три недели пред учебната година уште стојат неодговорени најважните прашања:
-Конечно, офлајн или онлајн ќе се учи?
-Како ќе се натераат децата да носат маски и визири?
-Како ќе се однесуваат во тоалетите?
-Како во мензите?
-На колку време ќе се чистат училниците?
-На колку деца им фалат компјутери?
-Колку наставниците компјутерски се потковани за да се одвива наставата онлајн, ама вистински а не како изминатите месеци преку Вибер, Гугл Класрум или маил?

Има уште прашања, недозволиво неодговорени – а време имаше. За разлика од минатиот пат, односно од месец март кога бевме сите, односно беше цел свет неподготвен. Здравите и функционални системи брзо најдоа солуциии се вклопија, а ние уште не знаеме точно што ќе се прави. Но, затоа за изборите сите институции кои инаку се бираат и постојат за во служба на народот – беа одличен експрес сервис за политичките партии. Во предкампањата за време и потоа, учениците беа неважни – туку бројот на гласови.