На 1 јуни стартуваат уписите, ама како ли ќе седат децата во училница?

Од 1 јуни започнуваат уписите на првачиња во училиштата. Протоколите како сето тоа ќе се одвива се веќе јасни. Но она што уште останува нејасно е зошто министерството нема стратегија за тоа како ќе се оди во училиште и ќе се седи во училница од септември, за кога е најавен втор бран на Ковид 19?

Некои од земјите веќе ги отворија училиштата. На пример Словенија. Додека македонскиот министер Арбр Адеми отворено призна дека план сеуште немаат и како би се одвивала наставата, оти децата ќе мора да седат на дистанца од најмалку 1 метар, а тоа во училници со по 35 деца е тешко изводливо.

„Скопско ехо“ веќе ги постави јавно прашањата до министерот, но одговор нема:

-Зошто до сега не се правеше „што ако?“ анализа која ќе се темелеше врз други, исто така спроведени анализи од терен: број на деца што имаат или немаат компјутери, интернет, живеат во руралните средини и слично…?

-На што го потроши министерството за образование ова време на корона – криза, ако не правеше анализи? Или пак реши онака предизборно да се самоизолира, за да се одмори пред кампања?

-Министер за образование (и неговиот тим сосе заменикот) во некоја нормална европска земја, кој нема решение, а требал да го најде до сега, самоиницијативно си дава оставка…

Ситуацијата е повеќе од сериозна, а инертноста на властите е несериозна. Промашена уште една учебна година, во која политичарите ќе влезат изборно, ќе биде на штета на учениците.