Најскапиот лимон се одгледува во Албанија

Најскапиот вид лимони во светот се одгледува во градот Љушња во средишна Албанија. Ова овошје кое е познато и под името „кавијар лимон“ или „прст лимон“ (‘caviar lime’, ‘finger lime’), потекнува од Австралија и се продава по 87 евра за килограм по нарачка во познатите ресторани во Европа, објави Албанската радиотелевизија.

Љушња е единствената област од ова поднебје каде што посебната разноликост на австралискиот микроцитрус се прилагодила на почвата и климата. Земјоделецот Клодијан Хида првите лимони од оваа сорта почнал да ги одгледува пред пет години во село близу Љушња, а првично родот го користел тој и неговото семејство. Хида засадил 270 корени од три подвида „лимон кавијар“. Плодот е исклучително баран на странскиот пазар, особено во Италија и Франција.

Овој лимон се разликува од тукашните лимони по тоа што од него не се цеди сок, туку се вади месестиот дел од плодот што е направен од влакна. Тоа се користи во разни салати, јадења од риба, како и за правење десерти.

Албанските ресторани сѐ уште не ја користат оваа сорта лимони, како што се наведува, поради високата пазарна цена.

Претходна вестСега и советниците на СДСМ бараат Градот Скопје времено да ја отстапи Универзална сала на Владата
Следна вестНови протоколи во случај на дојава за бомба во училиштата