Отворени денови на Институтот за македонски јазик „Крсте Мисирков“

Следната седмица на Институтот за македонски јазик „Крсте Мисирков“ од 11 до 15 ноември, ќе се организираат четвртите Отворени денови. Предвидени се повеќе активности, а свеченото отворање е в понеделник, во 11 часот. Директорката на Институтот за македонски јазик „Крсте Мисирков“ – Скопје, Елена Јованова-Грујовска на денешната прес-конференција информира дека Отворените денови ги почнале во 2016 година со благородна идеја, да се отворат вратите на Институтот за сите вљубеници во македонскиот јазик, за сите почитувачи, за медиумите, за студентите, учениците.

Ќе се организираат промоции на четири последни најнови институтски изданија – списанијата „Македонски јазик“ за 2018 година и „Македонистика“ од минатата година, бр.17, и промоција на две книги произлезени од докторски дисертации – „Сложенките во македонските црковнословенски текстови“ од проф. д-р Весна Костовска и „Јазикот на првите преводи на Новиот завет на современ македонски јазик напишан со грчко писмо“ од доц. Д-р Борче Арсов.