Пендаровски на церемонијата за старт на работата на гасниот интерконектор Грција – Бугарија

Претседателот на државата Стево Пендаровски денска ќе престојува во работна посета на Софија, каде на покана на неговиот бугарски колега Румен Радев, ќе присуствува на церемонијата по повод почетокот на комерцијалната работа на гасниот интерконектор Грција – Бугарија.

На церемонијата, што ќе се одржи во Националната палата на културата во Софија, како што е најавено, ќе присуствуваат и претседателката на Европската Комисија, Урсула фон дер Лајен, претседателите на Азербејџан и на Србија, Илхам Алијев и Александар Вучиќ и премиерите на Грција и на Романија, Киријакос Мицотакис и Николае-Јонел Чука.

Како што соопшти Кабинетот на шефот на државата, предвидено е претседателот Пендаровски за време на престојот во Софија да има и билатерални средби со Радев и со Фон дер Лајен.

Во рамки на посетата на Бугарија, како што е најавено, претседателот Пендаровски на автопатот „Струма” ќе положи цвеќе на местото на автобуската несреќа, во која на 23 ноември 2021 година, загинаа 45 македонски граѓани.

Гасниот интерконектор Грција – Бугарија (проект ИГБ) ја поврзува мрежата за пренос на природен гас на Грција во близина на градот Комотини со бугарската преносна мрежа во близина на градот Стара Загора. Имплементацијата на проектот има за цел да обезбеди диверзификација, не само на рутите, туку и на изворите на природен гас за Бугарија и поширокиот регион.

Интерконекторот, кој ги поврзува мрежите за пренос на гас на Грција и Бугарија, обезбедува пристап до Јужниот гасен коридор и голем број нови извори на природен гас, клучни за енергетската диверзификација на Бугарија. Гасоводот е со вкупна должина од 182 километри и ги поврзува системите за пренос на гас на Бугарија и Грција, вклучувајќи го и Трансјадранскиот гасовод. Уште во 2010 година ЕК финансираше 45 милиони евра за физибилити студии, а потоа уште 35 милиони евра од вкупната вредност на гасоводот, што е 240 милиони евра, од кои Европската инвестициска банка кредитира за изградбата со 110 милиони евра.

Овој интерконектор за Македонија има и дополнително значење, бидејќи ќе ни овозможи пристап и до складиштето за природен гас во Чилен во Бугарија, преку кој може да набавуваме ЛНГ од терминалот во грачкиот град Александрополис, а во текот на летото кога е поевтин и да го складираме во Бугарија, со можност да го користиме на зима кога е најпотребен.

 

 

Диверсификацијата на изворите со природен гас, треба да обезбеди сигурност во снабдувањето со природен гас за земјава на среден и долг рок, како и одлична можност за зголемување на перформансите на домашната економија, која може да биде конкурентна со земјите од регионот.