Вкупно пет угостителски објекти се казнети од страна на скопската општина Центар поради узурпација на јавните површини. При контролата направена во саботата угостителите на диво ги извадија масите и столиците и ги распослаа низ шеталиштето на кејот на Вардар кај Градски трговски центар. Казнети се „Дион“, „Карпе дием“, „Соул кичен“, „Бела виста“ и „Торос“.

Од Општина Центар велат „нема да дозволиме кејот повторно да биде узурпиран“.

-Нема да дозволиме кејот повторно да биде узурпиран. Во саботата вечер инспектори излегоа на терен и издадоа прекршочни платни налози на пет угостители. Казната е од 1.000-1.500 евра за правното лице и 300 евра за одговорното лице. Ќе ја пратиме ситуацијата, ако повторно ги извадат масите ќе добијат нови казни, изјавија од Општина Центар.

На сопствениците пред 3 години им беше дозволено да имаат тераси само пред објектите, каде тие зедоа 3,5 метри дополнителен јавен простор и ги изолираа со стакло заради пушење.