ЈСП „Скопје“ со сопствен капацитет ќе продолжи да го извршува јавниот превоз откако приватните превозници решија да го бојкотираат јавниот оглас за одржување на пет автобуски линии во градот.
-Градот Скопје даде можност за сите оние кои сакаат чесно и одговорно да работат и заработуваат од јавниот превоз, да се пријават на јавниот повик, соодветно бидејќи нема истакнат интерес ЈСП Скопје продолжува со сопствен капацитет да извршува непречен, навремен и стандардизиран јавен превоз. За оваа година, со цел подобрување на услугите на јавниот превоз, планирано е и дополнително зголемување на капацитетите на ЈСП со нови автобуси, изјавија денеска од Град Скопје за МИА.
Вчера истече рокот за пријавување и на вториот јавен повик за приватните автобуски превозници за линиите 9, 11 и 12, кадешто се бараа 28 автобуси и 59 возачи. Од Град Скопје додаваат дека останува да се види само евентуално доколку пристигне понуда по пошта. Јавното отворање на понудите, согласно јавниот повик, е закажано за 24 јануари во просториите на Градот.
Приватните превозници вчера соопштија дека ниту еден приватен автобуски превозник не се пријавил и на вториот јавен оглас на Град Скопје за одржување на неколку автобуски линии на градското подрачје. Вчера истече рокот за пријавување за одржување на линиите 9, 11 и 12, а пред една недела заврши без пријавени возачи и огласот за линиите 20 и 22.
Приватните превозници тврдат дека договорите за одржување превоз им биле незаконски раскинати и очекуваат со одлука на Влада да бидат вратени во системот на јавниот градски превоз, а за долгот кој ЈСП го има кон нив да се договорат по пат на медијација, како ќе им биде исплатен.
