Управниот одбор на Европскиот олимписки комитет (ЕОК) ја прифати кандидатурата на Македонскиот олимписки комитет (МОК), во 2025 година градот Скопје да биде домаќин на 18 издание на летниот Европски олимписки младински фестивал (ЕОМФ).
Претседателот на МОК, Даниел Димевски и градоначалничката Данела Арсовска денеска официјално ќе го преземат знамето на ЕОК како симбол за организација на следниот ЕОМФ на затворањето на годинешното издание во Марибор, Словенија каде што ќе биде потпишан и договор за соработка помеѓу ЕОК и МОК за организација на Европските младински игри, Скопје 2025.
Претходно (21 јули), делегација на ЕОК, го посети МОК кој организираше посета на спортската инфраструктура како и на сместувачките капацитети, но и средби со заменик Претседателот на Владата, Фатмир Битиќи и градоначалникот на град Скопје, Данела Арсовска. Сите, во еден глас ја поздравија оваа иницијатива на МОК и истакнаа дека овој најголем младински Европски мулти-спортски настан е извонредна можност да докажеме дека МОК и градот Скопје се подготвени да ја прифатат привилегијата и оваа неверојатна можност и извонредна обврска да бидеме домаќини на најдобрите млади европски спортисти благодарение на довербата на Европските олимписки комитети. Од организациски аспект претстои многу работа, но имајќи предвид дека зад МОК стојат ЕОК, но и Владата како и градоначалникот на Град Скопје, може само да се заклучи дека сме подготвени да дадеме неверојатни игри во Скопје, во 2025 година.
Претседателот на Европските олимписки комитет, Спирос Капралос им се заблагодари на градоначалничката на Скопје, Данела Арсовска и на претседателот на МОК, за нивната посветеност да се организира фестивалот. На ЕОМФ Марибор 2023, се натпреваруваат повеќе од 2400 спортисти во 11 спортски дисциплини. Првото издание на фестивалот се одржа во Брисел во 1991 година каде што младинци на возраст од 14 до 18 години се натпреваруваа на интернационалниот настан. Македонија ќе биде една од 25 европски земји кои биле домаќини на зимски и летни игри и 16-та во која ќе се одржи летното издание.
