Спасовски: Откриен пријавувачот на лажни бомби во Кавадарци

Кривична пријава ќе добие пријавувачот на лажни бомби во Кавадарци, соопшти денеска министерот за внатрешни работи Оливер Спасовски. Тој во одговор на новинарско прашање откри дека е уапсено одговорно лице за дојавата за лажни бомби во училиштата во Кавадарци во изминатиот период.
– Да, во однос на ова прашање за закани за поставени бомби во Кавадрци, кои ги вознемирија граѓаните, можам да кажам дека целосно е расчистен случајот. Денеска се поднесува кривичната пријава до соодветното обвинителство. Така да, откриен е сторителот и затворен е целиот случај, рече Спасовски.
Министерот наедно потврди дека станува збор за малолетно лице.
На 5 декември годинава на електронска адреса на пет училишта (две средни и три основни) во Кавадарци е упатена закана за поставена експлозивна направа. Полициските проверки покажале дека дојавите се лажни.