СЗО: Епидемијата во светот се влошува, не слабее

Дури 60 отсто од 10 милиони заболени од вирусот во светот се регистрирани во јуни, што значи дека епидемијата се влошува, а не дека слабее. Ова го соопштува Светската здравствена организација (СЗО).

Директорот на СЗО, Тедрос Адана Гебрејес, рече дека се регистрираат до 160.000 случаи дневно и ги повика сите земји да преземат сеопфатен пристап во борбата со коронавирусот.

-Пронајдете, изолирајте и водете сметка за секој случај, следете ги и ставете ги во карантин сите нивни контакти, обучувајте ги и опремувајте ги здравствените работници, едуцирајте ги и оспособете ги граѓаните за да можат да се заштитат себеси и другите, рече Тедрос.

Тедрос предупреди дека земјите што применуваат само дел од мерките имаат долг пат пред себе, пренесува „Гласот на Америка“.

-Не само тестирање. Не само физичка дистанца. Не само следење контакти. Не само да носат маски. Туку сè одеднаш, рече тој и истакна дека една од работите што ги научи во изминатите шест месеци е дека никогаш не е доцна да се промени ситуацијата во една земја.