Вчера имало вкупно 34 пожари во земјава, информира денеска Центарот за управување со кризи (ЦУК). Според добиените информации во Секторот за операции и координација во ЦУК добиени од институциите во Системот за управување со кризи активни пожари се уште два и тие се во општините Македонски Брод и Долнени.
Во Општина Македонски Брод, високо над с.Белица, на непристапен терен под Солунска Глава гори ретка борова шума во месноста „Аргулица“.
-Пожарот се уште е активен, при што е опожарена ретка борова шума на карпест терен со длабоки провалии и било речиси невозможен пристап за лица коишто би го гаснеле пожарот од земја, а е отежнато било и за воздухоплови. Во текот на вчерашниот ден на терен биле пожарникарите од ТППЕ Македонски Брод со два пожарникара и двајца вработени од ЈП „Национални Шуми“, подружница „Сандански“ од Македонски Брод, известува Регионалниот ЦУК Охрид.
Вториот активен пожар е во Општина Долнени, кај с.Небрегово, каде што гори мешана шума. Регионалниот ЦУК Битола, информира дека од 12:41 часот, вчера со 11 пожарникари и 2 ПП возила од Територјалната противпожарна единица ТППЕ Прилеп интервенираат за гаснење на запалената шума во атар на с.Небрегово, над манастирот. Притоа бил загрозен Манастирот „Свети Јован Крстител“ и бил голем ангажманот на пожарникарите е за негова заштита од огнот.
Фото: Архива
