Се преземаат дејствија за да се откријат прилините за насилната смрт на машкото лице чие тело беше пронајдено синоќа во струмичко Ново Село, соопшти денеска Основно јавно обвинителство – Струмица. Во соопштението се наведува дека дежурен јавен обвинител изврши увид во местото викано Ореш, во атарот на струмичко Ново Село, каде ноќеска беше пронајдено безживотно тело на починато машко лице.
– Според првичните сознанија, кај лицето настапила насилна смрт. По наредба на јавниот обвинител, врз телото на починатиот ќе биде извршена обдукција со цел да се утврдат точните причини за смртта. Од лице место се прибрани траги и материјални докази за кои е издадена наредба за вештачење, а се преземаат и други дејствија за откривање на сторители, информираат од струмичкото Обвинителство.
Претходно, МВР информира дека вчера во 19.10 часот во СВР Струмица било пријавено дека на место викано „Ореш“, атар на с.Ново Село, било пронајдено починато машко лице.
-Лекар од Итна медицинска помош констатирал смрт, а на телото имало видливи повреди. Увид на местото извршиле увидна екипа и Јавен обвинител, по чија наредба телото е предадено на обдукција, изјавија од полицијата.
