Нови поплави на повеќе места во Македонија, откако вчера поројните дождови повторно ги излеаја реките од коритата. Поплавени улици, дворови и обработливо земјиште, евакуација на население – слика што можеше да се избегне, ама требаше институциите на време да мислат и делуваат.
Е, зошто надлежните се секогаш изненадени, те од дожд, те од снег, те од суши?
Временските прилики не може да се контролираат, но може и мора да средува инфраструктурата.
Години наназад се предупредува дека речните корита не се доволно исчистени и проширени, дека одводните канали се затнати, а критичните точки немаат трајни насипи и заштитни ѕидови. Па така, наместо превенција, повторно гледаме само моментална реакција и зголемена пропаганда дека нешто се прави.
Локалните власти често најавуваат интервенции, но тие се краткорочни и недоволни. Потребна е координирана акција меѓу општините, државните институции и водостопанските претпријатија, со редовно чистење на коритата, реконструкција на канализациската мрежа и изградба на трајни насипи таму каде што ризикот е најголем.
Ќе дочекаме ли такво нешто или дождот без да го чекаме пак ќе дојде?
