Претседателот на Србија, Александар Вучиќ синоќа истакна дека во рамките на иницијативата „Отворен Балкан“ секој може секому да помогне и дека тоа е многу важно, особено во услови на криза.
-Можеме да им помогнеме на сите со гас, во одредени денови со струја во Северна Македонија, едни со други можеме да си помагаме со храна, одговори Вучиќ на прашањето кој кому може да помогне во рамките на „Отворен Балкан“ доколку дојде до подлабока криза.
Тој објасни дека секоја од државите може да помогне во одреден период.
-Да речеме дека има денови кога хидролошката состојба е подобра, па Албанија може да ѝ помогне на Северна Македонија со струја, па и на Србија, обратно – Србија може да им помогне, рече српскиот претседател.
Вучиќ истакна дека „тоа се важни работи“ и додаде дека Србија платила и два руски противпожарни хеликоптери кои носат кофа од 5000 литри и ќе можат да им помогнат на сите. На прашањето како ќе пристигнат тие летала, Вучиќ рече дека ќе пристигнат нормално, бидејќи тоа не е оружје што некој би го забранил.
