Премиерот Зоран Заев не е задоволен од она што го добил како предлог-решение за законот за државјанство од Алијанса/Алтернатива.
-Не е она што го договаравме, рече денеска Заев и најави нова средба со министерот и заменик-министерот за внатрешни работи, министерот за земјоделство за да се прецизира и да се пушти во парламентарна процедура. Но, уверен е дека договор ќе се постигне.
На вчерашите забелешки од претседателот на Собранието Талат Џафери дека и покрај лидерските средби, 28 закони и натаму се блокирани, Заев рече дека тие како Влада направиле сериозни отстапки – за пописот, изборното законодавство, делот за гласање со отпечаток од прст, промени во важењето за законски решенија, како она за пензионирање, постигнат е договор за законот за бесправни градби и дека сега на ред е опозицијата.
Ги повика претседателите на собраниските комисии од опозицијата да ги започнат расправите и да се одблокира работата.
Она што допрва ќе се договора со опозицијата се законот за АВМУ и за Клиничкиот центар.
Претседателот на Собранието Талат Џафери вчера рече дека 28 законски решенија и натаму се блокирани со амандмани, за разлика од претходно кога биле 37.
Најмногу амандмани – 2.697 има поднесено Алијанса/Алтернатива на законот за ревизија на инструментот за претпристапна помош ИПА.
