Заврши процесот на интеграцијата на Православната охридска архиепоскопија во редовите на МПЦ-ОА откако вчера беше устоличен Дељадровско-илинденскиот епископ Јоаким. Настанот се случи во новоизградениот храм „Свети Константин и Елена“ во општината Илинден. Претходно беа устоличени владиците Јован и Марко.
На литургијата му сослужуваа Кумановско-осоговскиот Митрополит Григориј, Крушевско-демирхисарскиот Јован, и епископот Делчевско-каменички Марко од МПЦ-ОА, како и Црногорско-приморскиот Митрополит Јоаникије, епископот Рашко-призренски Теодосије и Бихачко-петровачкиот Сергеј од СПЦ. На литургијата молитвено присуствуваа и епископот хераклејски Климент и Епископот Дртемвицки Давид. Меѓу гостите беше и амбасадорката на Србија во Македонија, Невена Јовановиќ.
Тројцата владици Јован, Марко и Јоаким кои добија епархии во МПЦ-ОА, ќе имаат право на глас во Синодот во полн состав, кој најверојатно треба да заседава кон крајот на годинава.
Со ова, Синодот на МПЦ-ОА сега ќе има вкупни 13 членови, предводени од архиепископот охридски и македонски г.г. Стефан.
Православната охридска архиепископија (ПОА) на Јован Вранишковски на 5 јуни годинава беше припоена со МПЦ-ОА за време на светата архијерејска литургија во црквата „Света Софија“ во Охрид. Литургијата, со која чиноначелствуваа поглаварот на МПЦ-ОА, г.г. Стефан, и поглаварот на СПЦ, г.г. Порфириј, се одржа по повод годишнината од врачувањето на томосот за автокефалност кој минатата година српскиот патријарх му го врачи на архиепископот охридски и македонски, со што се стави крај на 55-годишниот спор меѓу црквите.
