Судијата Садула Изаири, кој беше избран за судија во Основниот суд во Тетово во две илјади и осмата година, освои најмногу гласови на изборите за член на Судскиот совет од редот на судиите припадници на етничките заедници кои сочинуваат повеќе од дваесет отсто од населението во државата.
Гласањето за ова испразнето место се одржа вчера во сите судови низ Македонија, во периодот од осум до петнаесет часот. Изаири добил вкупно сто седумдесет и девет гласови од вкупно триста и деведесет судии кои учествувале во гласањето.
Прелиминарните резултати од изборите Комисијата за спроведување на избори на членови на Судскиот совет ги соопшти вчера доцна попладне. 
„Вкупниот број на гласачи запишани во Изборниот именик изнесува четиристотини и осумнаесет, од кои гласале триста и деведесет судии, што претставува излезност од деведесет и три проценти. Вкупно имаше дванаесет неважечки гласачки ливчиња“, изјави претседателот на Комисијата, судијата Осман Шабани.
За оваа позиција беа пријавени вкупно шест кандидати: Африм Јакупи, судија на Апелацискиот суд во Гостивар, Улбер Хасани, судија во Основниот граѓански суд Скопје, Хасан Асани, судија и претседател на Основниот суд Тетово, Џемали Саити, судија на Врховниот суд, како и Шпреса Граинца-Османи, судија во Основниот кривичен суд Скопје.
Останатите кандидати добија значително помал број гласови во однос на Изаири. Африм Јакупи освои шеесет и седум гласа, Џемали Саити педесет и осум, Улбер Хасани дваесет и шест, Хасан Асани дваесет и пет, додека единствената кандидатка, Шпреса Граинца-Османи, доби дваесет и три гласа.
Овие резултати се прелиминарни, а конечните резултати од изборите се очекува да бидат соопштени во текот на денешниот ден. Кандидатурите беа утврдени на седница на Судскиот совет одржана кон средината на овој месец.
