Видеото, кое Националната метеоролошка служба го објави на Твитер, прикажува прилично чист хоризонт на Њујорк околу 11 часот вчера, но како што чадот се згуснува, високите згради сè повеќе бледнеат во портокаловата магла и речиси е невозможно да се видат околу 14 часот, пишува Њујорк Пост.
Националната метеоролошка служба ја спореди снимката од градот, која ја нарече „речиси неверојатна“ со оние направени на површината на Марс. Оние кои се чувствителни на лошиот квалитет на воздухот, вклучително и постарите и малите деца, треба да го ограничат времето на отворено доколку е можно, предупреди метеоролошката служба.
Помеѓу големите градови, Њујорк го имаше најлошиот индекс на квалитетот на воздухот во светот во средата попладне од 484, што е означено како „исклучително опасно“ и највисоко ниво од 1960-тите.
Тоа е речиси три пати повеќе од индексот на хронично загадените градови како Дубаи (168) и Њу Делхи (164), според сајтот за мерење на квалитетот на воздухот „IQ Air“.
Во нормален ден во Њујорк, индексот на квалитетот на воздухот е околу 100. 
Претставниците на јавното здравство ги предупредија луѓето да не вежбаат надвор и да ја намалат изложеноста на чад што е можно повеќе бидејќи воздухот носи долгорочни ризици по здравјето. Експертите велат дека изложеноста на чад од шумски пожари може да предизвика низа здравствени проблеми.
Чадот од шумските пожари го бои воздухот во портокалова боја од истата причина поради која небото изгледа сино кога воздухот не е загаден. Имено, бојата е поврзана со видот на честичките во воздухот, нивната големина, количина и каква боја бранова должина ја блокираат.
Сончевата светлина содржи поголем спектар на бои. Но, додека минува низ атмосферата на Земјата, удира во молекулите и честичките во воздухот. Боите што се гледаат се оние бранови должини што остануваат по интеракција со честичките. Чадот од шумските пожари ги блокира пократките бранови должини, како што се жолтата, зелената и сината, а само црвените и портокаловите бои допираат до очите на луѓето.
