Вондреден инспекциски надзор во Градската општа болница „8 Септември“ побарал денеска министерот за здравство Венко Филипче околу случајот со непримањето на возрасен пациент заболен од Ковид – 19. Случајот во јавноста на социјалните мрежи го актуелизира скопјанката Даниела која била одбиена при обидот таму да ја смести својата болна мајка.
-Утрово, од ДСЗИ побарав да извршат вонреден инспекциски надзор за утврдување на возраста на пациентите хоспитализирани во ГОБ „8 Септември“, откако на социјалните мрежи и во медиуми излезе информација дека наводно пациент кој требало да се хоспитализира во ковид центарот во таа болница бил вратен поради неговата возраст. Во ГОБ „8 Септември“ од 107 лежечки пациенти, 38 се на возраст од 68 до 88 години, објави на својотпрофил на социјалната мрежа Фејсбук Филипче.
Тој потенцира дека пациент не може да биде вратен, единствено може да биде препратен во друг ковид центар доколку во ГОБ „8 Септември“ нема слободен кревет.
-Додека пациентот чека да биде пренесен во друга болница, му се прават потребните анализи и со амбулантно возило се носи во ковид центарот каде има слободен кревет за да биде хоспитализиран. Хоспитализацијата на пациентите во ниту еден случај не зависи од нивната возраст. Секој пациент, без разлика колку години е, има подеднакво право на болничка нега и третман, нагласи министерот.
