Минималната плата мора да се покачи. Со овој повик Синдикатот и работници синоќа тргнаа во протест барајќи минимална плата од 600 евра и зголемување на сите плати за најмалку 100 евра.
Според Синдикатот, сегашната минимална плата не ги следи реалните трошоци за живот и не обезбедува достоинствена егзистенција за работниците и нивните семејства. Тие предупредуваат дека ако се игнорира нивното бараење можен е и генерален штрајк, а ќе продолжи и иселувањето и недостигот од работници.
Работодавачите, пак, со поинаков став. Според нив, такво зголемување на минималната плата е тешко одржливо за голем дел од компаниите, особено за малите и средни претпријатија.
Премиерот Христијан Мицкоски истакна дека ова треба да се реши преку социјален дијалог меѓу синдикатите и работодавачите и додаде дека тој нема ништо против повисоки примања, но смета дека целта на синдикатите е политичка пресметка, а не повисоки плати за работниците 
Минималната плата навистина е ниска, но дали улицата е местото каде што таа треба да се утврдува треба да подразмислат сите страни инволвирани во проблемот. Потребни се итни разговори меѓу работниците и работодавачите и наоѓање решение според реалните можности на економијата во Македонија.
