Вкупно 141 лице во Македонија до сега е заболено од вирусот на сезонскиот грип, објави Институтот за јавно здравје. Во информацијата се наведува дека лани до овој период имало вкупно 169 заболени лица, односно, 28 повеќе отколку годинава.
Во однос на дистрибуцијата на по возрасни групи, најголем број на заболени се пријавени во возрасната група која опфаќа најголем дел од населението (од 15-64 години) – 55 случаи (39,0 отсто).
Само во неделата од 09 до 15 ноември во Македонија се пријавени 21 случај на заболени од грип. Заболените се пријавени во Дебар – 15, во Куманово – 4 и во Гостивар – 2. Од нив 9 се на возраст до 4 години.
Институтот за јавно здравје потсетува дека вакцинацијата против сезонски грип е најефикасна заштита од ова заболување, посебно за ризичните групи – постарите лица (над 65 години), деца на возраст од 6-59 месеци, лица со хронични болести, бремени жени и здравствени работници.
-Закажувањето за бесплатните вакцини ќе се одвива кај матичен лекар, преку електронскиот систем „Мој Термин“. Од почетокот на вакцинацијата вакцинирани се вкупно 3.948 лица од ризичните категории население со бесплатни вакцини. Во однос на комерцијалните вакцини, согласно достапните податоци од извештајот на ЦЈЗ Скопје, вакцинирани се 2.000 лица на територијата на Скопје, наведува ИЈЗ.
