Руските воени сили рано утрово навлегоа на територијата на Украина при што како што соопштуваат тамошните медиуми воздушни напади и експлозии се забeлежани во повеќе поголеми украински градови. Звуци на експлозии се слушале како во главниот град Киев така и во Харков и Одеса.
Украинската власт прогласила воена состојба на територија на целата земја. Нападот започнал нешто пред 4 часот по полноќ, откако рускиот претседател Владимир Путин во телевизиско обраќање соопштил дека наредил да започне „специјална воена операција“ со цел да се изврши „демилитаризирација и денацификација“ на Украина.
– Решивме да започнеме специјална воена акција насочена кон демилитаризација и денацификација на Украина. За секој кој би помислил на мешање однадвор: ако го стори тоа, ќе се соочи со последици најголеми во неговата историја. Сите релевантни одлуки се донесени, додаде рускиот претседател.
Украинската погранична служба информира дека украинските граничари и контролните пунктови се гаѓани од страна на руските трупи со артилерија и тешко вооружување. Украинското министерство за внатрешни работи јави дека армиските команди во Киев и Харков се гаѓани со ракети. Жителите на Киев во голем број почнаа да ја напуштаат престолнината. Според медиумски извештаи, експлозии се слушаат во источноукраинскиот пристанишен град Мариупол, како и во Одеса.
Украинскиот претседател Волдомир Зеленски во обраќање за јавноста по нападот најави воведување воена состојба во земјата.
-Русија ја нападнала војната инфраструктура и граничните сили. Ги повикувам граѓаните да останат во своите домови, додавајќи дека нивната армија е подготвена да одговори на нападите. Зборував со лидерите на САД, Германија, ЕУ, Полска и Велика Британија. Ги повикав итно да го спречат Путин, војната против Украина и против светот, напиша Зеленски на Твитер.
Украинските служби објавија и повеќе слики од експлозиите, како и снимки од граничниот премин Сенкивка помеѓу Украина и Белорусија на кои се гледа како голем број руски тенкови влегуваат во Украина.
Европската унија денеска упати итен повик до Русија да ги прекине воените операции и да ја повлече војската од Украина. Во заедничката изјава на претседателот на Европскиот совет Шарл Мишел и претседателката на Европската комисија Урсула фон дер Лајен се наведува дека мора да се почитува интегритетот на Украина.
-Ја повикуваме Русија веднаш да ги прекине воените операции, да ја повлече својата војска од Украина и целосно да го почитува нејзиниот територијален интегритет, суверенитет и независност, се вели во соопштението.
Се наведува и дека лидерите на ЕУ ќе разговараат за нови мерки против Русија по почетокот на операцијата против Украина.
Американскиот претседател Џо Бајден соопшти дека претседателот Путин избра војна со предумисла, а САД и нивните сојузници и партнери ќе одговорат на обединет и решителен начин. Тој ја осуди руската воена операција во Украина.
-Молитвите на целиот свет се со народот на Украина вечерва, бидејќи тие трпат неиспровоциран и неоправдан напад од руските воени сили. Претседателот Путин избра војна со предумисла која ќе донесе катастрофални загуби на животи и човечко страдање, се вели во соопштението на Бајден.
Се огласи и Кина која соопшти дека ја следи ситуацијата во Украина и повика на „воздржаност“ од сите страни откако рускиот претседател Владимир Путин нареди воена операција на европскиот сосед.
-Кина внимателно ја следи најновата ситуација и ги повикуваме сите страни да останат воздржани и да спречат ситуацијата да излезе од контрола, рече портпаролката на Министерството за надворешни работи Хуа Чунјинг на редовниот брифинг.