Намалување на акцизите за горивата во Македонија. Ова денеска ќе го побара пратеничката група на ВМРО-ДПМНЕ и коалицијата „За обнова на Македонија“, која до Собранието ќе достави два предлог – закони.
-Со првиот предлог-закон бараме намалување на акцизата за горивата за моторни возилата за 50 %, со што значително ќе се намали финансискиот товар врз граѓаните и транспортните компании. Со ова цената на бензинот веднаш ќе се намали 13 денари, а цената на дизел-горивото 9,5 денари, соопшти Бојан Стојаноски, пратеник на пратеничката група на ВМРО-ДПМНЕ.
Со вториот предлог-закон бараме до 31 декември 2022 година данокот на додадена вредност за производите за човечка исхрана и за топлинската енергија, т.е. парното, да бидат со 0 %. Дополнително, бараме и ДДВ за електричната енергија да биде 5 % и во остатокот од 2022 година, а не само до 1 јули, по што е предвидено покачување на ДДВ на 10 %.
Тој потсети дека вчера претседателот на Регулаторната комисија за енергетика најави ново зголемување на цената на горивата. Со што, како што рече, зголемувањата се огромни, надминуваат и 30 % од пред две години.
„Пред точно две години, на 2 март, цената за литар бензин изнесуваше 64 денари, а за литар дизел-гориво 56 денари. Во овој момент без најавеното покачување цената за литар бензин изнесува 82,5 денара, а за литар дизел-гориво 74 денари. Со оглед дека власта не размислува во интерес на граѓаните, ние како пратеничка група сметаме дека државата мора да се откаже од 50 % од акцизата во овој критичен период во кој има нарушување на светскиот пазар на енергентите, рече Стојаноски.
Покрај намалувањето на акцизите, од ВМРО-ДПМНЕ бараат и дополнително намалување на финансискиот товар на граѓаните преку целосно намалување на ДДВ за прехранбени производи од 5 на 0 %.
