Процентот на реализација на активностите и на препораките е многу мал и недоволен за успешно справување со корупцијата, предупреди денеска Билјана Ивановска, претседателка на Државната комисија за спречување на корупцијата. Таа зборуваше на денешната тркалезна маса „Култура на интегритет – Пат до успех во борбата против корупцијата“.
-Од извршената анализа за спроведување на препораките на ДКСК од страна на Владата и надлежните министерства констатиравме низок степен на спроведување на препораките, околу 30 отсто, што е многу ниско за успешно справување со корупцијата, предупреди Ивановска.
Премиерот Димитар Ковачевски, пак, потенцира дека политичката волја е клучна во борбата против корупцијата.
-Пред нас имаме многу работа. Тоа не е еднократен акт на дејство, тоа е воспоставување систем каде луѓе со високи етички и морални вредности ќе бидат дел од раководење со сите институции. Оние институции и организации, кои се најмногу изложени на можноста за корупција вообичаено со текот на времето, доколку нема добра легислатива и добро не се спроведува, стануваат најотпорни на притисок и продолжуваат на начинот на кој работеле до денот кога кај нив се правела контрола, потенцира Ковачевски.
Тој повика да се истражи скандалот кој го обелодени Антикорупциска – дека фирма за сервисирање лифтови, со фалсификати добила околу 90 тендери, главно од јавни институции, кои и плаќале со пари од буџетот.
-Ние сме држава во која постои сомнеж дека фирма која не постои добила 90 тендери, замислете да постоела колку ќе добиела. Тоа мора да се искорени, потецнира Ковачевски.
