Вчера, делегација на ВМРО-ДПМНЕ и Коалицијата за обнова на Македонија, предводена од претседателот на ВМРО-ДПМНЕ, Христијан Мицкоски, а во чиј состав беше и раководството на ВМРО-ДПМНЕ, како и пратениците од пратеничката група на ВМРО-ДПМНЕ и Коалицијата за обнова, оствари средба со претставници на три пријателски држави, земји-членки на Европската унија, Александар Шаленберг, министер за надворешни работи на Австрија, Јан Липавски, министер за надворешни работи на Чешка и Мирослав Влаховски, министер за надворешни работи на Словачка.
Во партиското соопштение се наведува дека претставниците на ВМРО-ДПМНЕ и Коалицијата за обнова на Македонија се заблагодарија за посетата на високите гости од Австрија, Чешка и Словачка и се осврнаа на ситуациите во Македонија, а поврзани со Европската унија.
-При тоа, тие истакнаа дека пречка на патот на Македонија кон ЕУ, повеќе и од Бугарија, е корупцијата во највисоките ешалони на власта, невладеењето на правото и злоупотребата на институциите. Беше подвлечена злоупотребата на европското знаменце во Собранието на РМ, каде се прави обид закони за игри на среќа и закони на штета на македонските граѓани да се поставуваат во скратена процедура за да се избегне дебата и одговорност пред граѓаните. Понатаму, претставниците ја подвлекоа конструктивната улога која Македонија ја играла во регионот сите изминати години, во сите кризи на Балканот, се наведува во информацијата.
Од страна на ВМРО-ДПМНЕ беше и соопштен ставот околу уставните промени.
-Во врска со намерата на власта, без вклучување на опозицијата во ниеден дел од преговорите, да протурка низ Собранието уставни промени под ултиматум од бугарска страна, претставниците едногласно го повторија заедничкиот став дека уставни измени под диктат нема да бидат поддржани и дека државата итно треба да се фокусира на завршување на вистински реформи на системот кои ќе значат вистинска европеизација. Ставот на Претставниците на ВМРО-ДПМНЕ и Коалицијата за обнова на Македонија останува дека европеизацијата на Македонија не смее да значи откажување од основните идентитетски одредници на македонскиот народ, вклучување на билатерални историски прашања во преговори со ЕУ и поигрување со националните чувства на македонскиот народ, се потенцира во информацијата.
