Намалување на казните предвидени за кривичните дела „Злоупотреба на службената положба и злосторничко здружување“, но и за други, се предвидени со предложените промени во Кривичниот законик што ги предлага Владата. Во македонското Собрание вчера започна постапката за нивно усвојување при што се предлага тие да се донесат со забрзана постапка со користење на „европско знаменце“. Дел од измените, кои според Владата се во име на усогласување со европското законодавство, се однесуваат и на казните за службените лица и тоа главно се ориентирани кон намалување на казните.
-Овој закон произлегува од Националната програма за усвојување на правото на ЕУ, се вели во пропратното писмо испратено до Собранието, а потпишано од премиерот Димитар Ковачевски.
Во предложените измени на Кривичниот закон се брише ставот 5 од членот 353 кој предвидуваше затворска казна од најмалку 5 години затвор за злоупотреба на служебната положба и овластување при вршење на јавни набавки или на штета на средствата од Буџетот. Во измените на овој член новина има и со додавањето на став кој предвидува одземање на прибавената имотна корист.
Во членот 353-в, кој се однесува на делото „Несовесно работење во службата“, досега предвидениот минимум од 3 години затвор за службено или одговорно лице во јавно претпријатие или установа кое ќе прибави значителна имотна корист, со измените е намален на 6 месеци и се движи најмногу до пет години.
Најдрастични се намалувањата во членот 394 каде се поместени казните за „злосторничко здружување“. Наместо максималните десет години затвор кои досега беа предвидени за тој што ќе создаде група или бадна, со измените се предвидува максимална казна затвор до три години. Има намалување и за членовите на групата или бандата кои ќе извршат кривично дело, максималната казна затвор од 5 години се намалува на максимални 2 години. Токму со делото „злосторничко здружување“ беа опфатени и голем број на обвинетите во предметите на некогашното СЈО.
Во образложението, Владата вели дека измените на законот се носат по примерот на германското законодавство и ќе бидат решение со кое ќе се „бајпасираат“ актуелните состојби додека не се донесе нов КЗ.
-Злоупотребата на службената положба и овластување веќе подолго време како инкриминација е критикувана и го има епитетот на реликт од казненото законодавство во поранешна Југославија. Главната забелешка е дека се работи за апстрактна инкриминација чие битие е бланкетно и сето тоа придонесува кон различно толкување во нејзината примена. Предложените решенија (намалувањето на предвидените казни) во член 353 како и бришењето на некои ставови се движат во насока да бидат на линија на новиот концепт во којшто се има направено стандардизација на критериумите за одмерување на казните. Во таа смисла се и корекциите на членот 353-в и 394 од КЗ, се вели во образложението.
Опозицијата веќе реагираше на вака изненадното предложено решение за измени во КЗ и за, според нив, уште една „злоупотреба на европското знаменце“ со кое рокот за расправа за ваков закон се скратува на три дена, без разлика колку амандмани ќе бидат поднесени.
