Масовни депортации, забрана за влез на муслиманите, царини за сите увезени стоки, крај на војната во Украина, отпуштање државни службеници. Oва се дел од ветувањата на Доналд Трамп, за кои вели дека ќе ги реаизира доколку повторно стане претседател на САД
„Гласот на Америка“ пренесува анализа на „АП“ дека, доколку се спроведат, плановите на Трамп ќе означат големи промени во владата, дури и поголеми отколку во неговиот прв мандат. Првите четири години на Трамп велат дека биле обележани со хаос, внатрешни борби и бројни претседателски декрети кои подоцна беа поништени од судовите.
Трамп ветува дека ќе се обиде да отпушти десетици илјади државни службеници затоа што сака „целосно да ја уништи длабоката држава“.
Тоа ќе се обиде да го направи со помош на регулативата што ја донел во 2020 година позната како „Распоред Ф“, која му овозможува да префрли голем број работници на други работни места. Како што најави, неговиот фокус ќе биде на „корумпираните бирократи во правосудниот систем, националната безбедност и разузнавачките служби“.
Се верува дека мети би можеле да бидат вработени во ФБИ и судството вклучени во кривичната постапка против Трамп.
Тој сака да се справи и со оние кои им даваат информации на новинарите. Тој најави и дека вработените во државната администрација ќе мора да поминат нова обука.
Трамп вети дека доколку дојде на власт, „веднаш ќе ја запре инвазијата на јужната граница на САД“ и ќе стави крај на илегалната имиграција.
Дел од тој план, вели тој, е најмасовната депортација во американската историја, насочена кон илегалните имигранти, особено оние со „џихадистички симпатии“. Тој најави и дека ќе ги укине студентските визи за оние кои имаат антиамерикански и антисемитски ставови.
Во обид да ја обезбеди границата меѓу САД и Мексико, Трамп вели дека ќе распореди десетици илјади војници во моментов таму во странство, како и дека ќе префрли некои федерални агенти, како што се оние од Агенцијата за борба против дрогата (ДЕА) и ФБИ, до граничната служба. Ветува и повеќе ѕидови на границата.
Тој сака да ја врати забраната за влез на муслимани од седум земји во САД, која веќе беше во сила кога тој беше на власт. По нападот на Хамас врз Израел, тој вети дека ќе воведе „идеолошки скрининг“ за имигрантите. Таа има за цел да ги забрани „опасните лудаци, мразители, расисти и манијаци“ и оние кои се „симпатизери на радикалните исламистички терористи и екстремисти“.
Трамп вели дека ќе ја прекине практиката на добивање американско државјанство при раѓање за оние кои се илегално во САД. Односно, за детето да добие државјанство при раѓање, барем еден родител мора да биде државјанин или легално да биде во САД.
Трамп најавува дека ќе стави крај на војната меѓу Русија и Украина уште пред инаугурацијата. Ова значи и запирање на „континуираното испраќање на американските богатства во Украина“. Трамп вели дека ќе побара од европските земји да и ги надоместат трошоците на Америка за надополнување на исцрпените резерви.
Тој не прецизираше дали ќе инсистира Русија да се повлече од Украина, од териториите што ги окупираше.
Тој вели дека ќе застане на страна на Израел, кој е во војна со Хамас, и ќе ги поддржи напорите на Израел да ги „уништи“ милитантите. Трамп најавува дека повторно „фундаментално ќе ја разгледа“ целта и мисијата на НАТО.
