Скопските општини скоро воопшто не ги плаќаат средствата за кои имаат обврска да ги исплаќаат кон „Лајка“, предупреди денеска ова градско јавно претпријатие.
Во дописот до јавноста се укажува дека проблемот со бездомните кучиња, за кој се почесто се говори, не може да се надмине без системско решение. Се наведува дека законот со кој треба да се регулира несовесното сопствеништво и граѓаните што фрлаат миленици повеќе од четири години е во процедура за донесување.
-Јавната свест за вдомување во Македонија е ниска, јавното претпријатие „Лајка“ кое треба да ги стерилизира е заглавено во стари долгови, бидејќи единствениот буџет кој го има е од Град Скопје, а скопските општини скоро воопшто не ги плаќаат средствата за кои имаат обврска да ги исплаќаат. Годишно секоја од скопските општини има обврска да исплати по два милиони денари (32.000 евра) за ЈП “Лајка“, а тие тоа не го прават. Како за пример од вкупно 10 општини во 2022 година средства исплатиле само 3, а за да има резултати Лајка треба да постапува во сите 10 општини. Ако сите општини си ги исполнуваат обврските, претпријатието ќе биде поефикасно, се потенцира во дописот.
Во соопштението се наведува и тоа дека, за жал, сега штетата за каснување на територија на овие општини ја плаќаат ЈП „Лајка“ и градот Скопје, а општините своите финансиски обврски не ги исплаќаат.
-Доколку сите 10 скопски општини си ги плаќаат обврските, претпријатието ќе работи сигурно и одржливо, а со тоа би се решил и проблемот со исплаќање оштети за каснување од бездомно куче, наведуваат од „Лајка“.
Се укажува и на тоа дека состојбата се влошува со носењето на голем број бездомни кучиња со комбиња од другите градови во Скопје, затоа што на другите општини тоа им е најлесен и најевтин начин за справување со проблемот.
-За овој проблем има и пријави до Министерството за внатрешни работи, но досега нема никава интервенција од полицијата. Дополнителен проблем се и селските кучиња кои имаат неодговорни сопственици и кои ги пуштат слободно се парат. Без соодветно законско решение за регулирање на сопствеништвото сопствениците ниту мораат да ги регистрираат, ниту плаќаат пенали за штетата што ја предизвикуваат, алармираат од „Лајка“.
