Трендот на бришење на меморијата на антифашистичката борба продолжува и со новата влада, објави денеска Јована Мојсоска, пратеничка од „Левица“ во македонскиот парламент. Таа реагира на вчерашниот чин на преименувањето на улицата која го носеше името на народниот херој Христијан Тодоровски – Карпош во Мајка Тереза во скопската општина Чаир, а што го објави вицепремиерот Изет Меџити.
-Наивно е да се верува дека ова е случајно и дека не се работи за системско бришење на АСНОМ од колективната меморија – токму од оние кои ги глорифицираат балистичките идеи. Претходната влада од СДС и ДУИ ја избриша улицата ,,Втора македонска ударна бригада”, сегашната влада на ДПМНЕ и Вреди го избриша Христијан Тодоровски – Карпош, потенцира Мојскоска.
Христијан Тодоровски – Карпош бил прогласен за Народен херој на Југославија на 29 јули 1945 година, како еден од првите борци од Македонија кои го добиле тоа одликување (заедно со Стеван Наумов – Стив, Орце Николов, Страшо Пинџур, Мирче Ацев и Кузман Јосифовски – Питу).
Бил член на Козјачкиот партизански одред од 12 октомври 1941 година и член на партизанскиот штаб од Куманово. Откако одредот бил разбиен, преминувал во Вториот јужноморавски одред и Кукавичкиот одред, наизменично (1942-43). На 26 јуни 1943 година станал командант на Кумановскиот партизански одред, кој постепено нараснувал и на 1 декември 1943 година бил официјално преименуван во Прв кумановски баталјон „Јордан Николов – Орце“.
Бил убиен од страна на бугарскиот окупатор на 7 февруари 1944 г. за време на нападот на бугарското воено и полициско упориште во селото Билјача, Прешевско.
Во негова чест се испеани неколку партизански песни: „Битка се бие кумановско поле“, „Давај ме, мила мамо, давај ме“ и „Горо ле, горо зелена“. Покрај тоа, Ацо Шопов му посветил две песни од својата стихозбирка „Песни“ од 1944 година: „Карпош“ и „Борбата на Дренак“, а го спомнува и во „Марш на Трета македонска бригада“, напишана исто така во 1944 година.
