Сведочиме на пад на просечната плата за 1.000 денари после години постојано покачување, соопшти денеска СДСМ.
Најголемата опозициска партија смета дека намалувањето на просечната е директен одраз на погрешните политики на Мицкоски и ВМРО-ДПМНЕ и значи удар врз стандардот на граѓаните.
-Економските политики на Христијан Мицкоски и владата на ВМРО-ДПМНЕ потфрлија. Неприфатливо е која било влада да дозволи пад на платите, особено во време кога семејствата се соочуваат со зголемени трошоци за живот и покачени цени на производите, велат од СДСМ.
Се додава дека падот од 1.000 денари значи помалку средства за основни потреби, намален квалитет на живот и понизок стандард.
-Во изминатите години, СДСМ континуирано ги зголемуваше платите, дури и во време на кризи, достигнувајќи над 41.000 денари. За споредба, во 2015 година, просечната плата под ДПМНЕ изнесуваше само 20.853 денари. Наместо да поттикнуваат раст и зголемување на платите, ВМРО-ДПМНЕ се враќа на политиките од минатото, каде работниците беа третирани како евтина работна сила. Бараме од владата на Христијан Мицкоски да ја промени оваа погрешна политика и да преземе итно мерки за покачување на платите, велат од партијата.
