Едно лице од Синѓелиќ е обвинето за производство и пуштање во промет на наркотични дроги, а по неговиот брат полицијата трага откако е утврдено дека во гаража чувале опојни дроги. Скопското основно јавно обвинителство денеска соопшти дека поднесе обвинение против 27-годишник од селото Сингелиќ, кој се товари дека во соизвршителство ги сторил кривичните дела – неовластено производство и пуштање во промет наркотични дроги и неовластено изработување, држење, посредување и тргување со оружје.
-Обвинетиот заедно со неговиот брат, кој во моментов е недостапен за полицијата, во гаражата во семејната куќа, во вградени специјални бункери во бетонскиот носач, неовластено држеле вкупно 6.451,27 грама хероин, како и 915 грама кокаин. Дрогата била спакувана во различни пакувања и полиетиленски ќеси, се наведува во обвинението.
При полицискиот претрес, во бункерот било пронајдено и оружје и муниција од поголемо количество и тоа вкупно 235 куршуми во различен калибар, еден пиштол марка ХС со една рамка со 16 куршуми, како и еден револвер марка магнум 357 со рамка со шест куршуми.
