Во текот на месецов во Македонија треба да пристигнат 200.000 вакцини против корона вирусот на кинескиот производител „Синофарм“. Министерот за здравство Венко Филипче преку Фејсбук денеска објави дека точниот датум на испораката ќе биде утврден следните денови.
-Ја почитуваме одредбата од договорот за тајност, податоците остануваат доверливи. Направивме детален план за процесот на вакцинација во три фази. Сите вакцини се безбедни и сигурни за граѓаните. Со имунизацијата почнуваме овој месец, наведе Филипче.
Вакцината на „Синофарм“ се чува и дистрибуира на температура од 2 до 8 степени, а вакцините се пакувани во формулација на претходно наполнет шприц, што ја олеснува и самата апликација на вакцината. Се очекува вакцините да пристигнат на аеродромот во Скопје, а направен е детален план за транспорт на вакцината од аеродром до економските оператори (веледрогерии) кои се задолжени за складирање на количините. Планот предвидува вакцинацијата на едно лице да трае по десет минути, а јавни здравствени установи ќе работат во две смени со цел да се постигне што повисока стапка на вакцинација на дневно ниво.
